Sarah G and Cristine Reyes - BATI NA!

Isa ang push.com.ph sa ilang nakasaksi sa pagbabati nina Sarah Geronimo at Cristine Reyes sa ASAP backstage, ngayong March 20.  Hindi inasahan ng mga nasa paligid na kinabibilangan ng ilang artista ang pagsasalubong ng dalawa at pagbabati. Nang magsalubong ang dalawa, unang tinawag ni Sarah si Cristine at humingi ito ng sorry. “Miss Cristine, bati na tayo,” ma-emosyunal na sambit ni Sarah sabay yakap sa sexy actress. Nangilid ang luha ng dalawa sa kanilang pagbabati. Later that day ay nag-guest si Sarah sa The Buzz at ikinuwento ang iba pang detalye.

“Matagal na matagal ko na siyang gustong makausap, pagkatapos ng lahat ng gulo, gusto ko na talagang mag-sorry sa kanya,” kuwento ni Sarah. “Walang pagkakataon po kasi marami rin kasing nagsasabi na masyado rin kasing masakit ang nangyari na kung ako ‘yung mauuna ganon. Pero ako sa sarili ko gustong-gusto ko nang mag-sorry para matapos na. Alam kong nasaktan din siya kaya kailangan ko ding mag-apologize.”

Kuwento ni Sarah, naiwan ng kanyang makeup artist (na makeup artist din ni Cristine) ang eye liner sa kanyang makeup room. Nakakita ng pagkakataon si Sarah at isasauli na sana ang nasabing eyeliner kay Cristine at eksakto namang nakasalubong niya ang aktres. “So nagtinginan kami. Parang umiwas pa siya,” bungad ni Sarah. “Siyempre may takot din sa akin. Tatanggapin kaya niya? Masasaktan kaya ako? Ano kaya ang mangyayari? So niyakap ko na lang siya, hindi ko na siya pinakawalan. Sabi ko Cristine wala talaga akong intensyon (na makasakit)…”

Sa wakas din ay nagbigay ng kanyang pahayag si Sarah hinggil sa pagbibiro niya dati sa ASAP rehearsals na ang magaling sumayaw ay lapitin ng seksing babae na tinutukoy ang dating boyfriend na si Rayver Cruz. Dahil sa nangyaring iyon ay nagalit si Cristine at nagpakawala ng matatapang na statement laban sa singer actress. “’Yung biro ko sa stage na ‘yon nung rehearsal, sine-set ko lang ‘yung mood na okay na tayo Ray (Rayver), ah. Tsaka ‘yung joke ko na ‘yon kay John (Prats) din ‘yon at Rayver ‘yung magagaling na sumayaw lapitin talaga ng magagandang at seksing babae, wala akong ibang ibig sabihin non at ‘yun ang gustong-gusto kong ipaliwanag kay Cristine.”

Idinagdag din ni Sarah na humingi rin ng sorry si Cristine kay Mommy Divine sa tagpong iyon. Ikinuwento pa niya na sinabi pa niya kay Cristine na nauunawaan niya ang mga naging reaksyon nito noong mga nakaraang isyu dahil nagmamahal ito dahil nagmahal din siya noon kay Rayver na boyfriend ngayon ni Cristine.

Good news for today.
Dapat talaga hindi nag aaway or nagkakagalit sa lalaki or hindi dapat pinag - aawayan ang love.
Kudos to Sarah G for being so humble and for always keeping her feet on the ground.

Sarah Geronimo: ‘Karapatan ko ring ipagtanggol ang sarili ko, ang pamilya ko.’

Kung pagbabasehan ang mga pahayag ni Sarah Geronimo ay tila nakabuti para sa Pop Star Princess ang kanyang pagsasalita hinggil sa naging relasyon nila noon na si Rayver Cruz at isyung kinasangkutan kasama si Cristine Reyes na girlfriend naman ngayon ni Rayver. 

Pero nilinaw ng singer-actress na hindi naging madali ang kanya ang pagsasalita. “Siyempre hindi po madali. Nung una po, ayoko na talagang pag-usapan, ayoko nang mabulatlat pa, pag-usapan ‘yung mga pangyayari pero wala, eh. Masyado na kasing masakit para hayaan ko ang ibang tao na ganituhin ako, ganituhin ang pamilya ko lalong-lalo na, so kailangan ko na rin talaga,” depensa ni Sarah. 

Sinabi ni Sarah sa panayam sa kanya ng The Buzz na naudyok siyang magsalita dahil sa pagsasalita nina Rayver at Cristine at para maipagtanggol ang sarili. “Kasi nagsasalita na rin sila. Para naman akong tanga kung ‘di na ako magsasalita. Meron naman akong dila. Karapatan ko rin namang ipagtanggol ang sarili ko, ang pamilya ko,” paliwanag niya. 

Dagdag pa ni Sarah, mas gumaan daw ang pakiramdam niya na nailabas na niya ang kanyang saloobin hinggil sa kontrobersyal na isyu.  “Masyado mong kino-contain ang emotions mo, wala kang outlet, wala kang mapagsabihan. Mas naging relaxed (ako ngayon). Mas okay po ako ngayon na nakakapagsalita na ako. Hindi tulad noon na itatago ko talaga.” 

Mas natuto raw siyang maging matatag dahil sa mga pangyayari. “Ang maganda don natututo tayo sa mga experiences natin, sa mga pagkakamali natin. Ginagawa tayong malakas na tao, kumbaga stronger and wiser. Nagpapasalamat ako sa mga pinagdaanan ko. Sana maintindihan ng ibang tao na ako, na kami, ay mga tao lamang din.” Matagal na rin daw siyang naka-move on mula sa paghihiwalay nila ni Rayver noon.

Samantala, patuloy naman daw ang pagganda ng relasyon nila ng kanyang leading man na si Gerald Anderson sa ginagawa nilang pelikula, ang Catch me...I’m in Love’. “Nabawasan na po ‘yung ilangan. Nahahampas ko na siya. Okay na kami, mas komportable kami sa isat-isa, ngayon lang kami nakakapag-usap,” kuwento ni Sarah tungkol kay Gerald. “Nagulat nga ako sa sarili ko, nabibiro ko na siya, ‘di tulad noon na ‘di ako nakakapagsalita. Kino-contain ko ‘yung tensyon, ‘yung kilig. Ngayon nasasabi ko na at mas masarap pala sa pakiramdam.”

source:

 Bernie Franco